the best way to get long hair || تجربتي فى استخدام الجرجير لشعر اطول
من فترة طويلة جدا اتبعت طريقة الـ no poo method
واتكلمت عنها فى موضوع سابق وبطلت استخدم اى منتج تجارى لشعرى
و كل فترة بجرب حاجة طبيعية جديدة لشعرى بعد ما بعمل سيرش كويس على فوائدها واضرارها
ومن ضمن الحجات اللى عجبتني فوائدها للشعر كان
...الجرجير ...
فوائده الكتير للشعر دفعتني لاستخدامه
ويمكن من اهمها انه بيطول الشعر وبيمده بالمعادن
وقرأت تجارب لنا كتير استخدمته لفترة طويلة وحبت النتيجة
استخدمته ازاى ؟
طريقته سهلة جدا بس شرط تعمليه وقت الاستخدام بس
متعمليهوش وتحفظيه فى التلاجة لانه هيبوظ منك
..............
مبدئيا استخدمت بعض عيدان الجرجير الخضراء وحددي الكمية علي حسب كثافة وطول شعرك
ومقدار مناسب من الماء ونضربهم فى الخلاط
ودى النتيجة قوامه مش سائل اوى ومش متماسك اوى
بعد كدا هنصفيه ونرمي بقايا الجرجير وناخد الماية بتاعته
انا حطيتها في زجاجة سبراي عشان تسهل توزيعه علي شعري
.........
بعد كدا وزعتها علي فروة راسي بالكامل ومقدمة الشعر مش لازم الشعر كله يعني .
لبست بونيه علي شعري لمدة ساعتين كاملين وبعدين غسلت شعري بطريقة الـ no poo ولكن ممكن تستخدمي الشامبو اللى تحبيه مش شرط يكون شامبو طبيعي
لكن برضو استخدام الشامبو الطبيعي بيجيب نتايج اسرع وافضل
....................
بستخدم الوصفة دى مرتين اسبوعيا من شهر تقريبا
فى المرة الاولى بغسل شعرى بالشامبو الطبيعي بتاعى
والمرة التانية بغسله بماء بس او شاي اسود
لان الشامبو بتاعى قلوى واستخدامه اكتر من مرة فى الاسبوع بيجفف الشعر
...........................................................................
طيب نسأل الاسئلة المهمة بقي ✌
هل فى الفترة دى حسيتي بنتيجة ؟
طبعاا والا مكنتش كتبت الموضوع
عموما انا حابة اأسس البلوج بتاعتي ع المصداقية والامانة
مش مجرد نقل مواضيع وتضييع وقت ع الفاضي
الهدف الاول من كتابة اي موضوع بيبقي تعميم الفايدة
واللى يعرفونى شخصيا عارفين انى معنديش اسرار جمالية
وكل حاجة بعملها بقول عليها ....
نرجع تاني للموضوع ≻_≺
حسيت بنتيجة تقريبا من رابع مرة للاستخدام
خصوصا انى قبل ما ابدأ فى استخدام الوصفة قصيت جزء كبير من اطراف شعري بالغلط وكنت حزينة عليه
بس بعد الاستخدام لاحظت ان شعرى بقي اطول شوية
تقريبا زاد 1.5سم او اكتر بس كان ملحوظ بالنسبالى
..................................
انا شخصيا اعتقد ان السبب فى ظهور النتيجة بالسرعة دي
هو طريقة الـ no poo اللى بتبعها من 5 شهور او اكتر
والنظام الغذائي الصحي اللى بحاول امشي عليه اوقات كتير
وعلاج المشاكل الرئيسية للشعر زي القشرة والتقصيف والتساقط
لان منطقيا شعرك مش هيكون مقصف وبيتساقط وفيه قشرة وبتستخدمي شامبو تجاري ولما تستخدمي الجرجير هيطول !
لازم لازم لازم تعالجى المشاكل من جذورها الاول وبعدين تدوري على النتيجة
............................................
اتمني تكونوا استفدتوا من تجربتى
اللى عندها تجربة مشابهة تكتبهالنا
دمتم بخير ❤
تعليقات
إرسال تعليق