No poo method || تجربتى فى الاستغناء عن شامبو الشعر
انهاردة حبيت انقل تجربتى فى الاستغناء عن الشامبو
اللى بيسميها بعض الناس الـ no poo method
و اللى على اساسها بطلت اعرض شعرى لاى نوع من انواع الشامبو او البلسم او حمام الكريم الكيميائي
واستبدلتهم بمواد طبيعية تماما مستحيل تضر الشعر
.......
ازاى خطرتلى الفكرة !
دا اول سؤال الناس بتسألهولى لما بقول تجربتى
والحقيقة انى قريت عن تجربة بلوجر عربية
اسم البلوج بتاعتها حياتى وردى
......
قريت كتير عن تجارب الناس قبل ما اخد اى خطوة فى الموضوع
والنتايج كانت مرضية كتيير وشجعتنى ابتدي
..............
اهم حاجة تتأكدى ان نتيجتها مش هتظهر فى ايام معدودة
اى طريقة تتبعيها نتيجتها مش بتظهر قبل 3 شهور استخدام
.........
وكمان لازم تكونى مقتنعة تماما بيها قبل البداية عشان العامل
النفسي ليه دور كبير فى نتيجة الاستخدام
........
ايه الموضوع بالتفصيل بقي ؟
هنحتاج لشامبو طبيعي وبلسم طبيعي
ومبدئيا المكونات موجودة فى كل بيت
الشامبو
عبارة عن مكون رئيسي
وهو البيكينج صودا
او صودا الخبز
او كربونات الصوديوم بمسمياتها المختلفة
وعندنا فى مصر اسمها الكربوناتو
وماء فاتر
فى وعاء مناسب او كوب كبير
بتحطى معلقة كبيرة من صودا الخبز لكل كوب ماء
وتقلبيهم
او على حسب احتياج شعرك وكثافته
ممكن تستخدميه مباشرة او تحطي معاه بعض الاضافات
لاغراض معينة ...مثلا
الملح--> للتقليل من قشرة الرأس
العسل الاسود--> لترطيب الشعر
الفلفل الاسمر--> لتطهير فروة الراس
لو هتحطي اضافات ف ياريت يكون مكون واحد بس
من المكونات السابقة عشان يحقق اكبر فايدة لشعرك
.......................
البلسم
ممكن تكون عند البعض خطوة مش مهمة
بس في الـ no poo method
خطوة ضرورية لابعد مدى والا شعرك هيتضرر جدا
ازاى ؟
مبدئيا خلينا عارفين ان تأثير كربونات الصوديوم
على الشعر قلوى
واننا لازم بعد الخطوة بتاعت الشامبو
نرجع درجة الـ ph المتعادلة للشعر تانى
ف مضطرين نستخدم بلسم حمضي
عشان نمنع جفاف الشعر
ف هنعتمد بشكل خاص على خل التفاح
وبشكل عام على الخل بأنواعه لو متوفرش خل التفاح
وهو عبارة عن 2 معلقة كبيرة خل تفاح لكل كوب ماء فاتر
وممكن نضيف معاه احد المكونات السابق ذكرها
...........
معلومات مهمة لازم تعرفيها قبل التجربة
- فى البداية شعرك هيتعرض لجفاف نسبي واحيانا للتساقط نتيجة عدم استخدام الشامبوالصناعى وهيستمر لمدة اسبوعين على الاكثر
- اتباع طريقة الـno poo method لمدى الحياة بلاش تستخدميها فترة وترجعي تانى للشامبو لأنك كدا بتأذي شعرك بدون وعي
- ابتعدى تماما عن مجفف الشعر والسيشوار والمكواه لانها من اهم اسباب تلف الشعر ومع الوقت شعرك مش هيبقى محتاج للوسائل المدمرة دي
ناس كتير استنكرت الفكرة لعدة اسباب
اولهم ان الشامبو بيخلى ريحة الشعر حلوة
والاستغناء عنه هيخلى الشعر ريحته مش لطيفة !
بالعكس تماما الشامبو الطبيعي بيمنع تعرق الشعر
وبيمتص الدهون الزائدة فى فروة الراس
وبيخليكي تحسي بنضافة شعرك لفترة طويلة
ولو حابة تكون ريحة شعرك حلوة ممكن تضيفي
زيوت عطرية للبلسم او تدهني بيها شعرك مباشرة
زي زيت الورد والياسمين واللافندر والبرتقال
..............
وعشان تحافظى على شعرك اكتر
حاولى تستخدمى الوصفة دى مرة واحدة فقط
كل 5 ايام على الاقل او 7 ايام على الاكثر
ولو حسيتى ان شعرك اتعرض للتعرق او الاتربة
قبل موعد غسيله ممكن تغسليه بماء بس
.......
انا بدأت التجربة دى من 5 شهور تقريبا ومكملة فيها
مجففتش شعرى فى بداية الاستخدام لأن شعرى دهني جدا
حسيت مع الوقت بالنتيجة من قلة التساقط
وزيادة ملحوظة فى طول الشعر
ومفيش تقصيف فى الاطراف
شعرى حاليا احسن بكتير من قبل كدا
وبستخدم معاها وصفات بديلة احيانا
هكتب عن تجربتى فيها قريبا
دمتم بخير ❤
تعليقات
إرسال تعليق